أول حاجا نتطرقو لأكثر المهن اللي نمارسوها هنا في بلادنا - الفلاحة : بصح آك عارف فلاح تقليدي مش اللي قاري تخصص فلاحة طبعا ،،، يعني انسان مزارع يمد للأرض الأرض تملدو بدون أدنى خطة أو استراتيجية او تعقيدات ( هذوك الصوالح خاصين بالمهندس الفلاحي اللي هوا بطال ومعندوش بلاصة طبعااا) - البناء : المهندسين المعماريين و البنائين المدنيين ( طبعا البنائين هذو هوما الفئة البطالة نتاع المجتمع سهل عليها ربي وصابوا خدمة نتاع زوفري يجيبو بيها دراهم) - الموظفون الحكوميون : مدنيين بطبيعة الحال أو عسكريين ،،، خلينا من العسكريين لا غبار عليهم ربي يحميهم كلاو الشوك على جال الدراهم اللي يدو فيها ،،، المدنيين اللي في المؤسسات العامة الحكومية رد بالك راني قلت " العامة" يعني المسخرة بطريقة مباشرة لخدمة الشعب كيما المستشفيات الحكومية و المحاكم وغيرها هذو خدام الشعب الـ public survant بطبيعة الحال بصح كاينين هذوك الجماعة اللي نفضل نسميهم أصحاب الكراسي الـ govrenment employee بالشكل الطبيعي الخام والبحت نتاعهم مثلا كيما جماعة البرلمان اللي خدمتهم يرفدو يديهم على قرار يشوفوه صائب وهو بطبيعة الحال غير صائب أو يخدم صوالحهم ويخلصو 40 مليون وراهم يخموو يزيدولهم - المعلمون - عمال التصنيع - التجار - عمال النقل والتخزين : سائقي المواصلات العامة والخاصة وعمال البواخر والطائرات ،،، الخ - الفئة المتنقلة : نحب نسميهم هكا على خاطر يخدمو على حساب توفر الخدمة مرة تصيبو زوفري مرة تصيبو عامل نظافة مرة تصيبو يبيع في حانوت مرة تصيبو يعاون في النجار وهكذا ،،، شتو علاه مراكمش تصيبو خدمة ؟ على خاطر عندنا une gamme نتاع المهن ضيقة جدا مرة تفرجت حلقة في خواطر شفت التعدد نتاع المهن لهيه -_- العجب المعجب برك شوفو حلقة مهن من ذهب ، حلول ابداعية ، تجارة منزلية ، الحرية المالية ،،، الخ ممكن تمدلكم فكرة على واش راي نهدر عموما نسيت عنواين الحلقات هيهيهيهييهي ممكن وحدا من الذي ذكرتهم لا تمت بصلة للموضوع ولكن ما علينا للفائدة فقط الحااجة الثانية التكبر على الخدمة صح اخي اختي علبالي بلي كامل كون جا بيدنا نخدمو في مجال الدراسة نتاعنا وكاين اللي عنهدم شهادات عليا بصح مصابوش بلايصهم وين راه المشكلة كي تروح تتعلم حرفة وتخدم فيها + علاه تقول نخدم غير في البيرو ولا مكانش سبحان الله هكا كل شي يحبس في البلاد علاه متحبش تخدم حرفة ،،، آآآ على خاطر دراهمها شوية وي عندك الحق أرجع حوس الحلقة اللي راني نمعنيلك عليها أنا متكفرتش عنوانها اذا اضطررت تفرج كامل حلقات خواطر 9 و 10 و 11 حتى تصيبها محتاج ابداع وبلاك مؤسسة صغيرة وفكرة مليحة باش تقدر تدير دخل مليح من الحرفة المهم كاين شي ناس يخدمو قنوات الصرف نتاع البيوت يعيطو لهذوك الناس اللي مدايرين مؤسسة صغيرة يجوهم ويشوفولهم المجرى المبوشي -_- مرانيش نقولك شرط هذي الخدمة عارفتكم تتكبروا على الخدمة بصح شوف الفكرة ( مؤسسة + فكرة ابداعية) وشكون قال بلي ممكن هذي تكون خدمة أخيرااااا اللوم نقدرو نلقوه على الدولة ثان على خاطر " حقارة "الناس الي تخدم في الرفاهية تخلص 40 مليون والناس اللي تخدم الخدمة اللي تعب يخلصو 2 ملاين علاه عامل النظافة الي ينقيلك الوسخ نتاع ( حاشاكم) تخلصوا هكاك -_-علاه المعلم تخلصو هكاك -_-
ليست هناك تعليقات:
إرسال تعليق