تغيضني الطفلة اللي خوها يضلي موراها
متلبسيش متخرجيش متهدريش متعمليش متقوليش
متقرايش متخدميش
تغيضني اللي تحب تدي بارمي يقولها خوها نو مخصكش
ايه ان شاء الله تجيك سكتة في نص الليل وميكونش كاين اللي يوصلك يا خنفوس
تغيضني اللي يقطعو عليها الويفي في الليل يقولولها نطلقوهلك غير في النهار
على أساس كون جات تحب تدير رايها متديروش في النهار
وهوما يمارسو كل أنواع المجون على الانترنت في الليل
،،،
أختو يعرف برك يقمعلها الكيان تاعها ويردملها شخصيتها
ماشي على خاطر يخاف عليها
مي على خاطر هو إنسان حيوان موسوس من كثر العيب والفضايح اللي دارهم مع البنات
حتى ولا يقولك البنات كامل كيفكيف ولا يقولك الرجال كامل كيفكيف ممكن واحد يلحس لاختي مخها
يا حبيبي هذو الرجال ماشي أنت
وهذي أختك ماشي البنات اللي كنت تشاتي معاهم وتهدر معاهم في التيليفون للربعة تع الصباح
وماذا بيك كي تولي عندك مرتك ولا بنتك تحكم فيهم كيما راك باغي
ولا مرتك تقطرلك الخل في عينيك ؟؟ وتدير شا قاللها راسها وأنت كي الطحان تتفرج وتضحكلها
أختك عندها باباها ويماها مالا متشقاش تلعبها الحرس الجمهوري
وراها كبيرة نظن ،،،
نحب نقولك الضغط يولد الانفجار
والمرا طبعها نتاع زكارة يعني ممكن تدير رايها غير باش تضحك عليك وتفهمك بلي يالي لاعبها فايق راني ماسحا بيك لرض
وانت لاخبر
علاه تقولها متخرجيش قولها اصبري نخرجو كيفكيف وتحط يدك في يدها وتنزه أختك وتتهلا فيها وتقصر معاها
علاه تقولها أمشي اغسلسلي حوايجي قولها ربي يخليك معليه تغسليهملي
علاه تخرج من فمك غير الهدرة الشينة القاسحة
علاه تقولها بدلي علينا جد ذي اللبسة قوللها ربي ميرضاهاش وثان انتي اختي وانا نغير عليك ومنحب حتى واحد يشوفك هكا
عيب راني راجل ونعرف الرجال شا يخممو كي تولي لابسا هكا
علاه متفهمهاش كل كلمة وكل تصرف يجي منك وتعرف غير تاكل في روحك
والأب والأم ربي يهديهم ثان
ميقولو والو لولدهم كي يشوفوه يحقر في أختو ويزير عليها بزاف
نتوما والدين ولا متفرجين
،،،
ربي يخليلي ماما نهار خويا يبدا يهدر هاك ولا هاك
تقولو باباهم مزال حي مدخلك فيهم
وأنا اللي ربيتهم ماك أنت ونعرفهم
وبناتي يعرفو وين يحطو رجليهم
أنت اللي نخاف عليك عس غير روحك
الحمد لله رب أكرم علينا بأم قوية
والحقيقة حتى خويا انسان مليح
ومهوش من النوع اللي يقمع آراء البنات ويسمع ويتناقش عادي
ليست هناك تعليقات:
إرسال تعليق