الجسم الاكتومورف غير القابل لزيادة الوزن وتخزين الدهون

عمري 24 ووزني  تيت تيت تيت
منقدرش نقولهولكم
على خاطر راني نوزن كيما كنت نوزن في قديم الزمان ملي كنت نقرا في ثالثلة متوسط
نظن راكم فهمتو بلي أنا نوع خارق من المجاعة
،،،
ما علينا
السبب الأول لحالة الهزال اللي عندي وراثي
على خاطر فاميلتي جيهة الوالد الحبيب كامل رقاق
السبب الثاني شهيتي معتبرة جدا
منقدرش ناكل بزاف وبالنسبة ليا الأكل هو عملية متعبة جدا يعني ناكل لقمة زوج نفشل ونكره نمضغ
هيهييهيهيهيهيهيهيه
متقولوليش أشربي هيبتاجيل
لأنو سبق وشربتو وسببلي جوع متواصل ونوم متواصل ودوخخخخخخة شديدة بطبيعة الحال
ومبعد بمجرد محبستو عادت ريما لعادتها القديمة
ماعلينا أصلا دارلي اكتئاب
السبب الثالث مزاجي ،،، صحيح أنا انسانة هادئة جدا ونادرا ما تهدر أو تصدر عنها ردود أفعال نارية
ولكن اذا كنت حزينة أ عليا ضغط فمستحيل ناكل وممكن نصوملك 3 أيام عادي جدا
ببساطة تتوقف عندي الرغبة في الأكل
السبب الرابع هو نوع جسمي اللي هو " اكتومورف "
ممكن أول مرة تسمعو بهذي المفردة
ولكن كاين 3 أنواع من الأجسام الاكتومورف ، الميزومورف ، والاوندومورف 

نشرحهم كااامل لتعم الفائدة الاكتو اللي هو نوع جسمي  نحيل دقيق البنية بالطبيعة وجلدو ناعم البنية العظيمة نتاعو صغيرة شبه مستحيل أنو يخزن الدهون في الجسم يعني حتى وياكل بزاف مرايحش يخزن دهون يقدر ياكل كل شي وهو مطمئن عندو معدل استقلاب أو أيض أو كيما تقولو يا المفرنسين ميتابوليزم عالي جدا جدا أي يحرق بصورة جنونية السعرات الحرارية نتاعو هذي هيا الحاجا اللي تخلي لازم عليه أنو ياكل كاربوهايدرات بكميات تفوق الوصف صعب جدا أنو يحافظ على وزنو فما بالك أنو يرفع وزنو كيمة صغيرة من العضلات تغطي عظمو " اونديري عظلاتو ضامرين هييهيهييهيه " 

نظن كلشي مفهموم هنا بصح الحاجا اللي أنا مقدرتلهاش أني نزيد على واش راني ناكل 1000 سعرة حرارية للنهار انا في الاصل اذا استهلكت الكمية الاساسية 1000 فراني مليحة علهالك قررت أني نستهلك كالوريات مركزة بديت ناكل بروتين weight gainer  يعني مكمل لزيادة الوزن كيما اللي ياكلوه جماعة الحديد أسمو hulk mass امممممم منقدرش نحكم عليه بحكم عدم خبرتي في المكملات ولكن شفت خويا شاريه قتلو نقدر ناكل معاك قالي أوكي عموما هذا وش كاين في الهالك ماس 

الحقيقة مرانيش ناكل في الكمية الموصى بها واللي تزديك ب 2000 سعرة لأنو منيش نتعب بزاف في التمارين الرياضية نتاعي دونك مغرف وحدا نخلطها في الحليب وهي فرات ومرات قبل منرقد ثان ندير مغرف نخاف من الكاتابوليزم بما أنو حنرقد وحنقعد حوالي 8 سوايع بدون اكل الحقيقة انا انسانة موسوسة من المرض ونخاف على الكلى والكبد نتاعي بزاف دونك باش نتجنب أي ضرر ممكن يلحقو بيا المكمل اللي راني ناكل فيه نشرب ربع حبة ليمون في كاس ما بدون اضافة السكر كل صباح 20 دقيقة قبل الأكل باش نظف الكلى والكبد نتاعي والحاجة الزينة انو حتى لون بشرتي ولا مليح من هذي الطريقة yeeeeeyyyy نجو للسبور اللي راني ندير فيه بما أني أنسانة هزيلة فنتجنب الكارديو قدر الامكان والرياضات الهوائية وندير أكثر حاجا strength wourkouts أو تمارين القوة -_- متخافوش مدرتش عضلات كيما نتاع الرجال لكن شكل جسمي تحسن بزاف ووليت عبد بعدما كنت نص عبد ههههههههالبداية كانت صعبة لأنو في حياتي تقريبا مدرت رياضة منحكيلكمش على المرة الأولى كل عضلة في جسمي ولات توجع غير ماما تنوضني وتقعدني ولكن والفت مع الوقت كنت ندير التامرين نتاعي يوم بيوم يعني alternance بصح بعدها وليت ندير challenges يعني خدمة نتاع كل يوم هاهم ليكم شا راني ندير 

كاين وحدين محطيتهمش عندي غير لي فيديو تاعهم معنديش صور المهم أصعب زوج حوايج جاوني هوما push ups و wall sit الوال سيت منيش نقدر نتبع المدة اللي مدوها هوما ندير اللي قدرت أنا عليها وصايي وpush ups سييت قبلها اشكال بدائية قبل منولي ندير الطريقة اللي تديرها الناس على خاطر تع الصح ذراعيا مكانوش يقدرو يرفدوني استغرفت مدة طوييييلة جدا وأنا ندير فيهم بهذا الشكل 

بعد التمارين نشرب المكمل نتاعي أجمل حاجا أنو الفرق يبان في مدة قصيرة كي نقول قصيرة نقصد 15 يوم برك حبيت نقول اني السكوات ندير فيهم نورمال مرانيش نتبع في هذوك الجمل اللي مكتوبين في الصورة راهم يقولو counter balance box squat prisoner box squat بلا منكمل عرفتو شا راني نقصد ندير سكوات بالأوزان يعني نرفد وزن ثقيل كيما dumpels وصايي وسامحوني منعرفش لا نقولهم بالفرنسية لا بالعربية كلشي انجليزي ياه ونسيت نقولكم بلي ناكل في مسمنة نتاع فول الصويا ،،،المهم جسمي تعدل نوعا ما وجهي تعمر مرانيش ندير في السبور عندي وحد السمانة لأسباب صحية بصح نكمل عليه ان شاء الله لأنو جاب نتيجة باقي الشرح نتاع الاوندومورف والميزومورف مرة أخرى على خاطر تعبت أستودعكم الله